சுவையான பூண்டு சாதம் செய்வது எப்படி?

 சுவையான பூண்டு சாதம் செய்வது எப்படி?

வேலைக்குச் சென்றுவிட்டு களைப்பாக வீட்டிற்கு வரும்போதோ அல்லது உடல்நிலை சரியில்லாத நேரத்திலோ, சமையலறையில் அதிக நேரம் செலவிட யாருக்கும் விருப்பம் இருக்காது. அதே சமயம் நாவிற்கு ருசியாகவும், ஆரோக்கியமாகவும் ஏதாவது சாப்பிட வேண்டும் என்ற எண்ணம் தோன்றும். அத்தகைய தருணங்களில் செய்வதற்கு மிகச்சிறந்த உணவே இந்த பூண்டு சாதம். பூண்டின் நறுமணமும், காரசாரமான சுவையும் உங்கள் சோர்வை நீக்கி புத்துணர்ச்சி அளிக்கும்

தேவையான பொருட்கள்:

வேகவைத்த சாதம் – 1 கிண்ணம்

பூண்டு – 10 முதல் 15 பற்கள் 

வரமிளகாய் – 3 அல்லது 4

கறிவேப்பிலை 

கடுகு

உளுந்தம்பருப்பு

நல்லெண்ணெய்

 அல்லது நெய் 

உப்பு 

மிளகுத் தூள் 

மஞ்சள் தூள்

செய்முறை:

முதலில் ஒரு வாணலியை அடுப்பில் வைத்து, அதில் நல்லெண்ணெய் அல்லது நெய் ஊற்றி சூடாக்கவும். எண்ணெய் காய்ந்ததும் கடுகு, உளுந்தம்பருப்பு சேர்த்துத் தாளிக்கவும்.

 பின் வரமிளகாய் மற்றும் கறிவேப்பிலை சேர்த்து வதக்கவும். இப்போது பொடியாக நறுக்கி வைத்துள்ள பூண்டுப் பற்களைச் சேர்த்து, அவை பொன்னிறமாகும் வரை நன்றாக வதக்க வேண்டும். 

பூண்டு நன்றாக வதங்கினால் தான் சாதம் நல்ல மணத்துடன் இருக்கும்.

பூண்டு வதங்கியவுடன் மஞ்சள் தூள், மிளகுத் தூள் மற்றும் தேவையான அளவு உப்பு சேர்த்து ஒரு நிமிடம் கிளறவும். இறுதியாக, ஏற்கனவே உதிரி உதிரியாக வேகவைத்து எடுத்து வைத்துள்ள சாதத்தை இதில் சேர்த்து, மசாலா அனைத்து இடங்களிலும் பரவும்படி மிதமான தீயில் வைத்து நன்கு கிளறவும்.

சாதம் சூடாகி, பூண்டின் வாசம் சாதத்துடன் ஒன்றி வந்ததும் அடுப்பை அணைக்கவும். சுவையான மற்றும் ஆரோக்கியமான பூண்டு சாதம் தயார்.

  இதனை அப்பளம் அல்லது வறுவலுடன் சேர்த்துச் சாப்பிட்டால் மிக அருமையாக இருக்கும். இது செரிமானத்திற்கு மிகவும் நல்லது.